29-njy sentýabrda Türkmenistanyň Kabuldaky ilçisi Hoja Öwezow Owganystanyň daşary işler ministriniň wezipesini wagtlaýyn ýerine ýetiriji Amir Han Muttaki bilen duşuşyk geçirdi. Owganystanyň daşary syýasat edarasynyň ýolbaşçysy Türkmenistanyň Baştutanyna hem-de halkyna ýurdumyzyň Garaşsyzlygynyň şanly 30 ýyllygy mynasybetli gutlaglaryny beýan etdi. Bu barada TDIM-niň Metbugat gullugy habar berýär.
Bellenilişi ýaly, duşuşygyň barşynda taraplar iki ýurduň arasyndaky köpugurly hyzmatdaşlygy mundan beýläk-de ösdürmegiň derwaýyslygyny nygtadylar. Şu nukdaýnazardan, özara haryt dolanyşygynyň artdyrylmagy hem-de ykdysady gatnaşyklaryň täze ugurlaryny gözlemek maksady bilen, iki ýurduň işewürler toparlarynyň arasynda duşuşyklaryň guralmagynyň maksada laýyk boljakdygy barada aýdyldy.
