Türkmenistanyň raýatlygyna kabul etmek hakynda arza bilen ýüz tutan raýatlygy bolmadyk 2657 adama Türkmenistanyň raýatynyň pasporty gowşuryldy. Daşary ýurt raýatlarynyň 406-syna bolsa Türkmenistanda ýaşamak üçin ygtyýarnamalar berildi. Dabara Türkmenistanyň Döwlet migrasiýa gullugynyň Merkezi edarasynda geçirildi. Çärä Türkmenistanyň Döwlet migrasiýa gullugynyň başlygy Nazar Atagaraýew, BMG-niň Türkmenistandaky hemişelik utgaşdyryjysy Dmitriý Şlapaçenko, BMG-niň Merkezi Aziýa üçin öňüni alyş diplomatiýasy boýunça Sebit merkeziniň wekilleri, habar beriş serişdeleri, şol sanda TmCars.info-nyň habarçylary gatnaşdylar.
TmCars.info-nyň Döwlet migrasiýa gullugyndan alan maglumatlaryna görä, Türkmenistanyň raýatlygyna kabul edilen 2657 raýatyň 1463-si aýallardyr (1194-si erkekler). Olaryň içinde özbek (1775 adam), türkmen (746), gazak, azerbaýjan, rus, tatar, garagalpak, ukrain, koreý, lak, lezgi, täjik, ermeni we beýleki milletleriň wekilleri bar.
Türkmenistanda ýaşamak üçin ygtyýarnama berlen daşary ýurt raýatlarynyň arasynda türkmen (152 adam), özbek (135), rus, azerbaýjan, tatar, gazak, ermeni, täjik, ukrain, garagalpak, başgyrt, belarus we beýleki milletleriň wekilleri bar.
Türkmenistanyň Prezidenti Gurbanguly Berdimuhamedow ýakynda Türkmenistanyň çäginde hemişelik ýaşaýan, raýatlygy bolmadyk adamlaryň uly toparyny Türkmenistanyň raýatlygyna kabul etmek hakynda degişli Permana hem-de daşary ýurt raýatlarynyň uly toparyna Türkmenistanda ýaşamak üçin ygtyýarnamalar bermek hakynda Karara gol çekipdi.
Belläp geçsek, raýatsyzlygy ýok etmek häzirki wagtda tutuş dünýäde ilkinji nobatda durýan möhüm wezipeleriň biridir. Türkmenistan bu ugurda dünýä nusgalyk işleri durmuşa geçirýär. Bu ugurda ýurdumyz raýatlygy bolmadyk adamlara goldaw bermek we bu ýagdaýyň öňüni almaga degişli kepillikleri üpjün etmek üçin 2024-nji ýyla çenli raýatsyzlygy ýok etmek boýunça hereketleriň milli meýilnamasyny üstünlikli durmuşa geçirýär. Şu meýilnamanyň çäklerinde 2020-nji ýylda 2580 adam Türkmenistanyň raýatlygyna kabul edildi. Bu görkeziji 2019-njy ýylda – 863, 2018-nji ýylda — 735, 2017-nji ýylda — 1690, 2016-njy ýylda — 1381 adama deňdir.
