Özbegistan bilen Türkmenistan awtomobil, oba hojalyk we elektrotehniki enjamlaryň, taýýar dokma we deri önümleriniň, gurluşyk materiallarynyň önümçiligini ýola goýmak, şeýle-de iki ýurduň çäginde oba hojalyk önümlerini gaýtadan işlemek boýunça bilelikdäki taslamalary durmuşa geçirmegi meýilleşdirýär. Bu barada Trend Özbegistanyň Maýa goýumlar we daşary söwda ministrligine salgylanyp habar berýär.
14-nji sentýabrda Daşkentde premýer-ministriň orunbasary – Özbegistanyň Maýa goýumlar we daşary söwda ministri Sardor Umurzakow bilen Türkmenistanyň Ministrler Kabinetiniň başlygynyň orunbasary Esenmyrat Orazgeldiýewiň arasynda duşuşyk geçirildi.
Duşuşygyň barşynda taraplar Türkmenistanyň Prezidentiniň Özbegistan Respublikasyna boljak resmi saparyna taýýarlyk meselesine garadylar we iki ýurduň arasynda köptaraplaýyn hyzmatdaşlygy giňeltmegiň mümkinçiliklerini ara alyp maslahatlaşdylar.
Soňky 4 ýylda özbek-türkmen söwda dolanyşygynyň göwrüminiň 3 esse ýokarlanandygy nygtaldy. Oňyn ösüş oba hojalygy, miwe-gök önüm, farmasewtik we dokma önümleri, gurluşyk materiallary, nebit önümleri, elektrik energiýasy we beýleki harytlar bilen üpjünçiligiň ösmegi netijesinde gazanyldy.
Iki ýurduň arasynda bilelikdäki maýa goýum taslamalaryny köpeltmek, senagat kooperasiýasyny ösdürmek we söwda dolanyşygyny ýokarlandyrmak boýunça amaly çäreleri durmuşa geçirmäge özara taýýarlyk bildirildi. Täze maýa goýum taslamalaryny durmuşa geçirmek we geljekki ýokary derejeli saparyň ykdysady meýilnamasyny amaly mazmun bilen doldurjak özara bähbitli söwda şertnamalaryny baglaşmak boýunça teklipleri taýýarlamak maksady bilen iki ýurduň degişli ministrlikleriniň we edaralarynyň arasynda işjeň hyzmatdaşlygy ýola goýmak barada ylalaşyk gazanyldy.
Şeýle-de, nebitiň, nebit önümleriniň, elektrik energiýasynyň, himiýa önümleriniň, polimer materiallarynyň we mineral dökünleriň üpjünçiligini ýokarlandyrmak arkaly özara söwdanyň göwrümini artdyrmaga gyzyklanma bildirildi.
Iki ýurduň işewür toparlarynyň arasyndaky gatnaşyklary ösdürmek boýunça bilelikdäki işiň derwaýysdygy bellenildi. Ýokary derejeli saparyň öňüsyrasynda Özbek-Türkmen işewür forumyny guramak barada ylalaşyk gazanyldy. Duşuşygyň ahyrynda taraplar gazanylan ylalaşyklary iş ýüzünde durmuşa geçirmek boýunça işjeň işlemäge taýýardyklaryny bellediler.
