Amerikaly milliarderleriň köpüsi ykdysady taýdan uly zyýan ýetiren täze koronawirus ýaýrawyna garamazdan, soňky 17 aýda baýlyklaryny ep-esli artdyrdylar. Bu barada Waşingtonyň hökümete degişli bolmadyk Institute for Policy Studies guramasynyň hasabatynda aýdylýar diýip, TASS habar berýär.
Gözlegçiler “pandemiýa döwründe amerikaly milliarderleriň 1,8 trln dollar baýandyklaryny”, ýagny olaryň umumy baýlygynyň tas üçden iki (62%) ýokarlanandygyny bellediler. 2020-nji ýylyň mart aýynda ol, takmynan, 3 trln dollar diýlip hasaplandy, 17-nji awgusta çenli 4,8 trln dollara ýetdi. Geçirilen hasaplamalara görä, 2020-nji ýylyň mart aýynda ABŞ-da 614 adam bir milliard dollar ýa-da ondan köp möçberli baýlyga eýeçilik edýärdi. Şu ýylyň awgust aýyna çenli şeýle adamlaryň sany 708-e ýetdi.
Hasabatda Amazon korporasiýasyny esaslandyryjy Jeff Bezosyň soňky 17 aýda 75 mlrd dollar, Tesla we SpaceX kompaniýalarynyň ýolbaşçysy Ilon Maskyň 150,8 mlrd dollar, Microsoft korporasiýasyny esaslandyryjy Bill Geýtsiň 32,6 mlrd dollar, Facebook kompaniýasynyň ýolbaşçysy Mark Sukerbergiň bolsa 74,2 mlrd dollar baýandygy aýdylýar.
Gözlegçiler öz hasaplamalarynda, esasan, “Forbes” žurnalynyň maglumatlaryna esaslanýarlar. Şeýle-de, pandemiýanyň netijesinde ýüze çykan ykdysady çökgünlik sebäpli, soňky 17 aýyň dowamynda “86 milliondan gowrak amerikalynyň işsiz galandygy, tas 38 million adamyň wirus bilen keselländigi, 625 müňden gowrak adamyň ýogalandygy” bellenilýär.
