Italiýanyň meşhur Wenesiýa şäheriniň häkimiýetleri 2022-nji ýylyň tomsundan başlap syýahatçylardan şähere baryp görendikleri üçin töleg almagy meýilleşdirýär diýip, Bloomberg agentligi habar berýär.
Agentligiň maglumatlary boýunça, ýerli ýaşaýjylar Wenesiýa “zyýan ýetirýän” syýahatçylardan yzygiderli zeýrenýärler, ýöne şäher administrasiýasy şäheriň ykdysadyýetiniň bu ýere gelýän myhmanlara bagly bolandygy üçin syýahatçylardan ýüz öwürmäge taýýar däl. Muňa garamazdan, häkimiýetler eýýäm birnäçe ýyl bäri syýahatçylyk akymyna gözegçilik etmek boýunça çäreleri girizmegiň mümkinçiligini maslahatlaşýarlar diýip, lenta.ru belleýär.
Şeýlelikde, şäheriň gözel ýerlerine barmak üçin öňünden hasaba alnan dynç alyjylar şäheriň taryhy merkezine alyp barýan esasy ýollarda gurulmagy meýilleşdirilýän turniketler arkaly goýberiler diýlip çaklanylýar. Şol bir wagtyň özünde petegiň bahasy möwsüme we belli bir günde garaşylýan syýahatçy sanyna görä, üçden on ýewro çenli üýtgäp biler.
Şeýle-de, diňe ýerli ýaşaýjylaryň we olaryň garyndaşlarynyň däl, eýsem Wenesiýanyň myhmanhanalarynda otag bronlan syýahatçylaryň hem salgytdan boşadyljakdygy aýdyňlaşdyrylýar.
