Türkiýäniň «TRT 1» teleýaýlymy 6-njy sentýabrdan «Alp Arslan» atly täze teleserialyny ýaýlyma berip başlar. Bu barada kp.ru habar berdi.
Filmde baş rollarda Baryş Arduç we Burak Özçiwitiň aýaly Fahriýe Ewjen çykyş edýär. Fahriýe üçin täze taryhy dessandaky bu rol uzak göwrelilik rugsadyndan soň ekranlara dabaraly ýagdaýda dolanyp gelmek bolup durýar. Onuň öz işine jogapkärçilikli çemeleşip, eýýäm gylyçlaşmak we at münmek boýunça birnäçe sapaklary alandygy bellenilýär.
Belläp geçsek, ýakynda teleýaýlymyň metbugat gullugy ýüzlenme bilen çykyş etdi, onda "Alp Arslanyň" "Oýanyş: Beýik Seljuklar" serialynyň dowamydygy nygtalýar. Ol üç möwsümden ybarat bolar.
Mundan ozal serialyň ýaýlyma goýberilişiniň yza - oktýabr aýynyň dördüne süýşürilendigi habar berlipdi. Ýöne teleýaýlymyň resmi wekilleri bu maglumatlary inkär etdiler.
