Özbegistanyň Prezidenti Şawkat Mirziýoýewiň 6-njy awgustda Türkmenistana sapar bilen gelip, Awazada geçirilýän Merkezi Aziýa döwletleriniň Baştutanlarynyň üçünji konsultatiw duşuşygyna gatnaşmagy meýilleşdirilýär. Özbek Lideriniň metbugat gullugyna salgylanyp, Sputnigiň berýän maglumatynda Awaza duşuşygynyň dowamynda sebitleýin hyzmatdaşlygy ösdürmek bilen baglanyşykly meseleleriň ara alnyp maslahatlaşyljakdygy aýdylýar.
Ýeri gelende bellesek, Merkezi Aziýa döwletleriniň Prezidentleriniň ýokary derejeli geňeşmelerini geçirmek başlangyjy hem Özbegistanyň Prezidenti Şawkat Mirziýoýewe degişlidir. Onuň 2017-nji ýylyň sentýabrynda BMG-niň Baş Assambleýasynyň 72-nji sessiýasynda öňe süren teklibiniň sebit döwletleri we halkara guramalar tarapyndan biragyzdan goldanylmagy bu ýurtlaryň Baştutanlaryny 2018-nji ýylyň martynda Gazagystanda, 2019-njy ýylyň noýabrynda bolsa Özbegistanda duşurdy. Daşkentde geçirilen ikinji duşuşygyň Bilelikdäki Beýannamasynda sebitiň bäş döwletiniň Baştutanlary görnüşde ýokary derejedäki geňeşmeleri her ýylda yzygiderli guramagyň zerurdygy beýan edildi. Pandemiýa zerarly ýüze çykan ýagdaýlar bilen baglylykda, sebitiň ýurtlarynyň Prezidentleri iki ýyldan soň, 2021-nji ýylyň 6-njy awgustynda Hazaryň türkmen kenarynda netijeli gepleşikleri geçirerler.
