Garaşsyz ýurdumyzda sanly ykdysadyýetiň ösdürilmegi ugurdaş düzümler bilen hyzmatdaşlygy pugtalandyrar. Birleşen Milletler Guramasynyň Ösüş maksatnamasy hem-de Söwda we ösüş boýunça konferensiýasy bilen hyzmatdaşlykda «Bir penjire» ulgamyny döretmek boýunça amala aşyrylýan taslama uly ähmiýete eýedir.
Bu ugurda «Konteýnerlere degişli gümrük Konwensiýasyna goşulmak hakynda», «Konteýner goruna geçirilen we halkara daşamalarynda ulanylýan konteýnerler üçin gümrük düzgüni hakyndaky Konwensiýasyna goşulmak hakynda» Türkmenistanyň Kanunlary kabul edildi. Bu bolsa ýük daşamagyň halkara ülňülerine laýyklykda amala aşyrylmagyna ýardam berýär. Oňaýly konteýner usuly halkara ykdysady hojalygynda bähbitliligi taýdan-da bellidir. Konteýnerlerde her bir önümiň we harydyň bir görnüşde ýerleşmegi, olary ýük göterijileriň we düşürijileriň degişli ulag gatnawlaryna gysga wagtda ýerleşdirýänligi üçin örän amatlydyr. Ýurdumyzda sanly ulgamyň işjeň ornaşdyrylýan döwründe ulag-logistika ulgamyna sanly tehnologiýalaryň giňden ornaşdyrylmagy jähetden, konteýnerlerdäki önümleri we harytlary ýörite döwrebap enjamlar arkaly gözden geçirmegiň anyklygy we takyklygy mese-mälimdir. Bu synagdan geçen tejribe sanly ulgamyň üstünliklerini has-da ilerledýär.
