7-nji iýulda «Türkmendeňizderýaýollary» agentliginiň ygtyýaryna gelip gowşan «Rahat» atly täze ýolagçy gämisi ilkinji gezek ýüzüşe goýberildi. Şu mynasybetli guralan çärä Balkan welaýatynda iş saparynda bolýan türkmen Lideri gatnaşdy.
TDH-niň habar berşi ýaly, Russiýa Federasiýasynyň Tatarystan Respublikasynda gurlan bu ýokary tizlikli ýolagçy gämisi deňizde gezelenç etmegi halaýan syýahatçylar we jahankeşdeler üçin niýetlenendir. Gäminiň umumy uzynlygy 33 metrden gowrakdyr. Ýolagçylar üçin ähli amatlyklary bolan gämi rahat ýüzüşi amala aşyrmak, ýüzüşiň dowamynda oňaýly dynç almak hem-de deňiz giňişligini synlamak üçin zerur şertler bilen üpjün edilipdir. Kenardan 100 mile çenli uzaklykda ýüzüşi amala aşyrmaga bolan ukyby, şeýle hem gäminiň tehniki görkezijilerine we häzirki zaman ýolagçy gämilerine bildirilýän ýokary talaplara doly laýyk gelýär.
Türkmenistanyň Prezidenti täze gämä mündi we ol gojaman Hazaryň giňişligi boýunça ilkinji ýüzüşini amala aşyrdy. Gämili gezelenjiň dowamynda Türkmenistanyň döwlet Baştutany egindeşleri bilen türkmen topragynyň bu ajaýyp künjeginde alnyp barylýan netijeli işleri yzygiderli dowam etmek, Hazaryň ekologiýasynyň ýokary derejesini, onuň biodürlüligini saklamak we künjegiň ösümlik hem-de haýwanat dünýäsini ylmy esasda öwrenmek bilen baglanyşykly meseleler boýunça pikir alyşdy.
