Hytaýly gurluşyk kompaniýalarynyň biri bary-ýogy 28 sagat 45 minudyň dowamynda gurlup gutarylan 10 gatly ýaşaýyş jaýynyň gurluşygynyň wideosyny görkezdi. Bu barada New Atlas habar berdi.
Habarda ýaşaýyş jaýynyň “Living Building” ulgamynyň kömegi bilen gurlandygy bellenilýär.
Bu gurnamanyň iň esasy üýtgeşik tarapy, onuň her bir gurluşyk modulyny ýük daşaýan konteýnere ýükläp, gurluşyk meýdançasyna eltip bolýadygyndadyr. Modul sim, izolýasiýa, aýna we howa çalşygy ulgamy bolan poslamaýan polatdan ybaratdyr. Kompaniýa binany ýygnamak üçin gurluşyk işgärleriniň uly bolmadyk toparyny ulandy we üç sany krandan peýdalandy.
