Beýik Britaniýanyň şa zenany Ýelizaweta II AstraZeneca sanjymyny döredijileri sylaglady. “Ýewropeýskaýa prawda” web-saýtynyň britan hökümetiniň saýtyna salgylanyp habar bermegine görä, sylaglama dabarasy şa zenanynyň doglan gününde geçirildi.
Aýratyn-da, rysar tituly AstraZeneca sanjymyny döretmäge gatnaşan Oksford uniwersitetiniň professory Endrýu Pollarda berildi. Şeýle-de, iki aýal sylaglandy: Oksford uniwersitetiniň professory Sara Gilbert we COVID-19-a garşy sanjym boýunça iş toparynyň başlygy Keýt Bingem. Olar kawaler hanymlar adyny aldylar.
“Kliniki synaglara gatnaşan adamlar möhüm rol oýnadylar. Hakykatda, olar häzirki wagtda tutuş dünýä iberilýän bu sanjymyň ulanylmagyny mümkin etdiler. Olaryň hemmesi gahryman. Olar koronawirusa garşy göreşde uly bir goşunyň bölegi” – diýip, Oxford Vaccine Group-yň ýolbaşçysy Endrýu Pollard belleýär.
Şa zenanynyň doglan gününde jemi 1129 adam dürli baýraklar bilen sylaglandy. Bellenilişi ýaly, sylaglananlaryň 23%-i koronawirus pandemiýasyna garşy göreşde – saglygy goraýyş pudagyna haýyr-sahawat kömegini bermekden başlap, möhüm infrastruktura goldaw bermekde alyp barýan işleri üçin baýrak aldylar.
Häzirki sylaglama etniki köpdürlüligi nukdaýnazaryndan rekord bolup durýar, sylaglananlaryň 15%-i milli azlyklaryň wekili.
