Russiýanyň 2020-nji ýyldaky ylym ulgamynda barlaglarda görlüp-eşidilmedik sepgitler üçin Döwlet baýragy koronawirusa garşy «Sputnik V» sanjymyny döredenlere gowşuryldy. Bu baýragy Gamalei adyndaky Epidemiologiýa we mikrobiologiýa merkeziniň direktory Aleksandr Ginsburg, onuň ylmy işler boýunça orunbasary Denis Logunow hem-de lukmançylyk hyzmatlarynyň polkownigi Sergeý Borisewiç aldy. Bu barada Russiýanyň Prezidentiniň kömekçisi Andreý Fursenkonyň sözlerine salgylanyp, kommersant.ru habar berýär.
«Aleksandr Ginsburg, Denis Logunow we Sergeý Borisewiç — bu atlar eýýäm jemgyýetde giňden meşhur. Olaryň «Sputnik V» sanjymyny oýlap tapmagynyň üstünligi ýöne ýerden däl — Russiýada eýýäm olar tarapyndan beýleki sanjymlaryň platformalary, şol sanda Ebola ýokanjyna garşy sanjym hem döredildi. Bu adamlar, gürrüňsiz, baýraga we jemgyýetiň çäksiz ünsüne mynasyp» diýip, Fursenko aýdýar.
Döwlet baýragynyň eýeleri 10 million rubl, diplom, hormat we frak nyşanlary bilen sylaglanýar. Sylaglamak dabarasy şu gün, 12-nji iýunda bellenilýän Russiýanyň gününde geçiriler.
