BMG Merkezi we Günorta Aziýanyň özara gatnaşyklarynda Owganystanyň orny hakynda Rezolýusiýa kabul etdi

BMG Merkezi we Günorta Aziýanyň özara gatnaşyklarynda Owganystanyň orny hakynda Rezolýusiýa kabul etdi

Özbegistan BMG-niň Baş Assambleýasy tarapyndan Merkezi we Günorta Aziýa ýurtlarynyň arasyndaky özara gatnaşyklary berkitmek hakyndaky Rezolýusiýanyň kabul edilmegini makullaýar, onda iki sebitiň arasynda gatnaşyklary ýola goýmakda Owganystanyň wajypdygy nazara alynýar. Bu barada Özbegistanyň DIM-niň "Dunýe" habarlar agentligi habar berýär.   

"BMG-niň Baş Assambleýasy Merkezi we Günorta Aziýanyň arasynda özara gatnaşyklary berkitmek hakyndaky ýörite Rezolýusiýany biragyzdan makullady" diýip, habarda aýdylýar.

Agentlikde Özbegistanyň Prezidenti Şawkat Mirziýoýewiň  2021-nji ýylyň iýulynda geçen  "Merkezi we Günorta Aziýa: sebitleriň özara gatnaşygy. Çagyryşlar we mümkinçilikler" atly Daşkent konferensiýasynda Rezolýusiýasyny kabul etmek baradaky başlangyjy öňe sürendigi ýatlanylýar. Resminama 40 ýurduň, şol sanda Russiýanyň, Hytaýyň, Eýranyň, Pakistanyň, Türkiýäniň we Türkmenistanyň awtordaşlygynda işlenip taýýarlandy.

"Şeýle-de, Rezolýusiýada Merkezi we Günorta Aziýanyň arasynda gatnaşyklary ýola goýmakda Owganystanyň ornunyň, şeýle hem parahatçylygy we durnuklylygy pugta üpjün etmek üçin sebitara ykdysady öňe gidişliklerde onuň ykdysady ösüşiniň we integrasiýasynyň möhümdigi göz öňünde tutulýar" -diýip, "Dunýe" belleýär.

Resminamada Merkezi we Günorta Aziýa ýurtlarynyň arasynda ykdysady ösüşi çaltlandyrmak, söwda-ykdysady gatnaşyklaryň netijeliligini ýokarlandyrmak we olaryň taýsyz ulag-üstaşyr we maýa goýum kuwwatyny amala aşymak üçin ulag we üstaşyr geçelgeleriň wajypdygynyň nygtalýandygyny agentlik sözüniň üstüne goşýar.