28-nji oktýabrda “Mançester Ýunaýtediň” we Portugaliýanyň milli ýygyndysynyň hüjümçisi Kriştianu Ronaldu gelinligi Jorjina Rodriges bilen ekizlere garaşýandyklaryny habar berdi. Futbolçy USB-niň (ultrases barlagy) suratyny saklap düşen fotografiýasyny Instagramda ýerleşdirdi.
Trend-iň Gazeta.ru salgylanyp habar bermegine görä, portugaliýaly oýunçynyň bu posty 27,7 mln laýk gazanyp, türgeniň Instagram taryhynda iň köp laýk alan suraty boldy. Mundan öňki rekord “PSŽ-niň” argentinaly hüjümçisi Lionel Messä degişlidi, onuň bir posty 22 mln laýk aldy.
36 ýaşly Ronaldunyň dört çagasy bar: 2010-njy ýylda doglan Kriştianu-kiçi, 2017-nji ýylda doglan Ýewa bilen Mateo we 2017-nji ýylda doglan Alana Martina.
Rodriges Ronaldu bilen tanyşanda, Madriddäki “Gucci” dükanynda satyjy bolup işleýärdi. Olaryň arasynda gatnaşyk peýda boldy. Olar 2016-njy ýyldan bäri duşuşýarlar.
27-nji awgustda “Mançester Ýunaýted” Ronaldunyň dolanandygyny habar berdi. Oýunçy bu topar üçin 2003-nji ýyldan 2009-njy ýyla çenli hem çykyş edipdi. Ol toparyň düzüminde Angliýanyň premýer-ligasynyň (APL) üç gezek çempiony we Çempionlar ligasynyň ýeňijisi boldy.
