Hytaý howanyň üýtgemegine täsir edýän ekologik görkezijileriniň birnäçesini gowulandyrdy. Bu barada HHR-iň Döwlet geňeşiniň metbugat diwanhanasy tarapyndan neşir edilen “Hytaýyň howanyň üýtgemegine täsirlenmesi: syýasat we hereketler” atly ak kitapda aýdylýar diýip, TASS-a salgylanyp, Day.Az habar berýär.
2020-nji ýylda HHR-de kömürturşy gazynyň zyňyndylarynyň intensiwligi 2015-nji ýyl bilen deňeşdirilende 18,8% we 2005-nji ýyl bilen deňeşdirilende 48,4% peseldi. Bu görkezijiler 2005-nji ýyldan 2020-nji ýyla çenli zyňyndy intensiwligini azaltmak boýunça Hytaý tarapyndan 40-45% aralygynda kesgitlenen maksatly görkezijiden ýokary boldy. HHR soňky 15 ýylda uglerod intensiwligini 5,8 mlrd tonna azaltdy.
Deslapky hasaplamalar boýunça, 2020-nji ýylda Hytaýyň energiýa sarp edilişiniň umumy gurluşynda gazylyp alynmaýan energiýa çeşmeleriniň (GES, AES, ýel, Gün elektrik stansiýalary we ş.m) paýy 15,9% boldy. Bu 2005-nji ýyldakydan 8,5 göterim nokady köpdür.
2020-nji ýylda Hytaýda gazylyp alynmaýan energiýanyň umumy önümçilik kuwwatynyň paýy 44,7% boldy. Gün elektrik stansiýalarynyň kesgitlenen kuwwaty 2005-nji ýyl bilen deňeşdirilende 3 müň esseden gowrak, ýel elektrik stansiýalarynyňky 200 esseden gowrak ýokarlandy.
2020-nji ýylda HHR-de umumy energiýa sarp edilişi 5 mlrd tonna kömür ekwiwalentinden geçmedi. 2005-nji ýyldan 2020-nji ýyl aralygynda umumy energiýa sarp edilişinde kömrüň paýy 72,4%-den 56,8%-e çenli azaldy.
Hytaýyň energiýa sarp ediliş gurluşynda kömrüň paýynyň azalandygyna garamazdan, ýurt henizem bu energiýa çeşmesine ep-esli derejede garaşly bolup, onuň sarp edilişini artdyrýar. 2020-nji ýylda HHR-de 3,84 mlrd tonna kömür öndürildi, bu ondan öňki ýyl bilen deňeşdirilende 2,4% köpdür. Hytaý 303 mln tonna kömür import etdi, bu 2019-njy ýyldakydan 1,5% köp. 2020-nji ýylda kömrüň sarp edilişi 2,8 mlrd tonna boldy.