Tibetde tapylan 416 ýaşly üzüm agajy dünýäde iň gadymysy diýlip ykrar edildi. Ösümlik Ginnesiň rekordlar kitabyna girizildi.
Uzak ýaşan bu agaç Gündogar Tibet daglarynda, Dzogang etrabynyň Zuoba obasynda, 2400 metr belentlikde ýerleşýär. Onuň boýy sekiz metre ýetýär, düýbüniň töweregi 209 santimetr, sütüniniň diametri bolsa 67 santimetrdir.
Agajyň ýaşy ýyllyk halkalarynyň derňewi we fiziki ölçegler arkaly anyklandy. Alymlar bu halkalaryň diňe bir ýaşy däl-de, eýsem, howanyň üýtgemegi – sowuk we yssy ýyllar, gurakçylyklar we ýagyşly möwsümler hakynda maglumatlary özünde saklaýandygyny belleýärler.
Deňeşdirmek üçin: medeni üzüm agaçlarynyň köpüsi 50 ýyldan köp ýaşamaýar, az sanlysy ýüz ýaşa ýetýär. Dzogangda bolsa ýüz ýaşdan uly 64 sany agaç tapyldy. Hytaýyň Oba hojalyk ylymlary akademiýasynyň doktory Wan Haýbo, bu rekordçy ýabany üzüm agajynyň tebigatyň sabyrlylygyny we ýaşaýşa ukyplylygyny görkezýändigini aýtdy.
Ondan öň iň garry agaç diýlip Sloweniýanyň Maribor şäherindäki "Köne agaç" (The Old Vine) hasaplanylýardy, oňa 1972-nji ýylda 350-400 ýaş diýlen kesgitlenipdi. Takyk kesgitlemek kyn boldy, sebäbi onuň sütüniniň merkezi çüýräpdi.
