27-28-nji iýun aralygynda Daşoguz we Ahal welaýatlarynyň çäginde ralli-reýd boýunça Türkmenistanyň çempionaty geçirildi. Umumy uzynlygy 358 kilometre barabar bolan iki günlük ýaryş Garagum çölüniň iň çylşyrymly ýerlerinden geçdi. Bu barada THP habar berýär.
Ýaryşyň ugry iki tapgyra bölünip, birinji tizlikli bölegiň aralygy 181,32 km, ikinji tapgyryňky bolsa 61,43 km boldy.
Çempionat Türkmenistanyň Awtomobil sport federasiýasy, Içeri işler ministrligi, Saglygy goraýyş we derman senagaty ministrligi, şeýle hem Türkmenistanyň Bedenterbiýe we sport baradaky döwlet komiteti tarapyndan bilelikde guraldy. Ýaryşa ýurduň degişli federasiýasyna we ministrliklerine, şol sanda Awtomobil ulaglary ministrligine wekilçilik edýän ekipažlar gatnaşdy.
Iki günlük bäsleşigiň netijeleri boýunça umumy hasapda çempionatyň ýeňijileri we baýrakly orunlaryň eýeleri kesgitlendi.
Ýaryşda iň ýokary netijäni Türkmenistanyň Awtomobil sport federasiýasynyň türgeni Baýram Annagulyýew görkezdi. Ol Nissan Patrol awtomobilinde ýoly 3 sagat 39 minut 56 sekuntda geçip, birinji orny eýeledi.
Ikinji orna Nissan Patrol ulagynda 3 sagat 46 minut we 1 sekunt netije bilen Awtomobil ulaglary ministrliginiň wekili Merdan Toýlyýew mynasyp boldy.
Üçlügi bolsa Toyota Hilux awtomobili bilen pellehana 4 sagat 2 minutda gelen Ahal welaýatynyň polisiýa müdirliginiň işgäri Çaryýar Çaryýarow jemledi.
