Türkiýe Respublikasynyň Stambul şäherinde Bütindünýä Etnosport Konfederasiýasy tarapyndan guralan 8-nji Halkara etnosport medeniýet festiwaly geçirildi. Dünýäniň 24 ýurdundan müňden gowrak wekiliň gatnaşmagynda geçen bu çärede Türkmenistanyň “Galkynyş” milli at üstündäki oýunlar topary özüniň täsirli çykyşlary bilen tapawutlandy.
Halkara festiwalynda Gazagystan, Gyrgyzystan, Ýaponiýa, Ispaniýa, Italiýa, Meksika, Gazagystan, Özbegistan ýaly onlarça döwletiň medeni toparlary çykyş edip, öz halklarynyň däp-dessurlaryny, at üstündäki oýunlaryny we sportuň milli görnüşlerini görkezdi. Şolaryň arasynda türkmen atly ýigitleriniň dünýäde meşhur bolan ahalteke bedewleri bilen ýerine ýetiren çylşyrymly we sazlaşykly tilsimleri tomaşaçylarda aýratyn täsir galdyrdy.
Festiwalyň jemleýji gününde oňa gatnaşyp, ýokary netijeleri görkezen toparlar sylaglandy.
Halkara çäresiniň ýapylyş dabarasynda hem çykyş eden “Galkynyş” topary festiwalyň degişli sertifikatyna mynasyp boldy. Bu üstünlik toparyň halkara medeni hyzmatdaşlygy pugtalandyrmaga we türkmen halkynyň milli gymmatlyklaryny dünýäde wagyz etmäge goşýan goşandynyň nobatdaky ykrarnamasydyr.
Festiwal halklaryň özara ýakynlaşmagynda hem-de medeni-ynsanperwer gatnaşyklaryň ösdürilmeginde uly ähmiýete eýe boldy.
