Çehiýanyň paýtagty Praganyň howa menzili halkara gatnaw ýollarynyň sanyny çalt depginde artdyrmagy we ýolagçy akymyny giňeltmegi başaryp, «Routes Europe 2026» bäsleşiginiň iň uly we baş baýragyna mynasyp boldy.
Bu hakda Italiýanyň Rimini şäherinde geçirilen «Routes Europe 2026» forumynda yglan edildi. Baýraklar aeroportlara, awiakompaniýalara we syýahatçylyk guramalaryna gatnaw ugurlaryny ösdürmekde hem-de özara hyzmatdaşlykda gazanan üstünlikleri üçin berilýär.
Praganyň howa menzili diňe bir baş baýragy almak bilen çäklenmän, eýsem ýyllyk ýolagçy sany 5 milliondan 20 milliona çenli bolan aeroportlaryň arasynda hem birinji boldy.
2025-nji ýylda Çehiýanyň bu iň uly awiasiýa merkezi 17,8 million ýolagça hyzmat etdi. Bu bolsa öňki ýyl bilen deňeşdirilende 8,5% köp bolup, pandemiýadan öňki ýokary görkezijilerden hem geçmegi başardy.
Diňe 2025-nji ýylyň özünde aeroportuň goldawy bilen 24 sany ugur boýunça 46 sany täze marşrut açyldy. Praga uçup başlan täze awiakompaniýalaryň sany 12-ä, umumy hyzmatdaş daşaýjylaryň sany bolsa 89-a ýetdi.
– Ýewropanyň beýleki uly howa menzilleriniň arasyndaky örän güýçli bäsleşigiň içinde bu iki baýragy almak biziň üçin örän uly üstünlikdir – diýip, Praga aeroportunyň ösüş boýunça ýolbaşçysy Irži Wyskoç belleýär.
Howa menziliniň täze maksatnamasy bar bolan gatnawlaryň sanyny köpeltmek bilen birlikde, dünýäniň iň uly ykdysady merkezlerine göni uçuşlary açmagy hem göz öňünde tutýar.
Açylan täze ugurlar: Seul (Günorta Koreýa), Abu-Dabi (BAE), Toronto (Kanada) we Şarža.
2026-njy ýyldaky täze meýilnamalar: ýakyn wagtda Filadelfiýa (ABŞ) we Taýbeý (Taýwan) şäherlerine hem göni gatnawlary açmak meýilleşdirilýär.
Şeýle-de «Routes Europe 2026» baýrak gowşurylyşynda Britaniýanyň «Jet2» awiakompaniýasy eýýäm bassyr üçünji ýyl Ýewropanyň iň gowy awiakompaniýasy diýlip yglan edildi.
