Gazagystanyň hökümeti ýeňil senagaty ösdürmegiň täze toplumlaýyn meýilnamasyny taýýarlaýar. Maksatnamada harytlaryň hökmany suratda ýörite belliginiň girizilmegi, kärhanalary döwrebaplaşdyrmak we ýurduň içinde çig mal önümçiligini artdyrmak göz öňünde tutulýar.
Pudagyň wekilleri täze giriziljek bu meýilnama sebäpli telekeçileriň goşmaça çykdajylarynyň artjakdygyny, munuň bolsa önümleriň bahasynyň belli bir derejede gymmatlamagyna getirip biljekdigini çaklaýarlar.
Täze döwlet maksatnamasyna laýyklykda, senagat we gurluşyk ministrligi matalaryň hem-de beýleki serişdeleriň daşary ýurtlardan getirilmegini azaltmagy maksat edinýär. Ýurtda pagta ekmekden we ýüňi gaýtadan işlemekden başlap, taýyn eşikleri öndürmäge çenli doly zynjyr dörediler. Döwlet tarapyndan beriljek ýeňillikler we goldawlar göni ýerli çig maly ulanmak şertine bagly bolar. Meselem, Türküstan sebitinde eýýäm pagta ýüplügini öndürýän zawod işleýär, geljekde bolsa hut şol ýerde mata hem dokalyp başlanylar. Kärhanalaryň enjamlaryny täzelemek we täze önümçilikleri açmak üçin telekeçilere pes göterimli karzlar berler.
Harytlary belgilemek taslamasynyň ýolbaşçysy Ýerlan Karabaýew bu ulgamyň basgançakly görnüşde giriziljekdigini mälim etdi. Ilki bilen harytlaryň 10 sany görnüşine bellik ediler. 2027-nji ýylyň güýzüne çenli bolsa bu ulgam 30-dan gowrak haryt koduny gurşap alar. Ýagny, käbir ownuk-uşak zatlardan başlap, tas ähli eşikler hökmany suratda belgileniler.
Çykdajylar sebäpli bahalar az-kem gymmatlar, ýöne işewürler üçin gowy tarapy, döwlet tarapyndan salgyt ýeňillikleri berler.
Häzirki wagtda ýeňil senagatyň Gazagystanyň umumy önümçilik pudagyndaky paýy 1 göterimden hem azdyr. Ýyllyk önümçilik göwrümi takmynan 260 milliard teňňä ýetýär. Bu pudagyň ýarysyndan köpüsini dokma, üçden birinden gowragyny tikinçilik, 10%-den azragyny bolsa aýakgap we deri önümleri emele getirýär.
