Rumyniýaly režissýor Kristian Munjiuwyň "Fýord" atly kazyýet dramasy 79-njy Kann kinofestiwalynyň baş baýragy bolan "Altyn palma" baýragyna mynasyp boldy. Ýeňijileri yglan etmek dabarasy şenbe güni agşam Festiwallar köşgünde geçirildi.
Ýeňiji bolan film Norwegiýanyň bir obasyna göçüp barýan kakasy rumyniýaly we ejesi norwegiýaly georgiularyň maşgalasy barada gürrüň berýär. Olaryň durmuşy bulaşýar we çagalaryna garşy zorluk ulanmakda şübheli görünmegi sebäpli maşgala jemgyýetçiligiň ünsüni özüne çekýär. Filmde döwletiň şahsy durmuşa gatyşmagynyň çäkleri öwrenilýär. Filmde Sebastian Sten we Renate Reinswe baş keşpleri janlandyrýarlar.
Festiwalyň ikinji iň ýokary baýragy bolan Baş baýragy Andreý Zwýaginsewiň "Minotawr" filmi gazandy.
Iň gowy režissura üçin baýragy iki filmiň döredijileri paýlaşdylar: "Gara şar" filmi üçin ispan režissýorlary Hawýer Ambrossi we Hawýer Kalwo, "Watan" filmi üçin bolsa polýak režissýory Pawel Pawlikowskiý.
Tankytçylaryň Pawlikowskiý bilen Zwýaginsewiň filmlerini “Altyn palma” baýragynyň esasy dalaşgärleri hasaplaýandygyny bellemek gerek.
Eminler toparynyň baýragy nemes režissýory Waleska Grizebahyň “Arzuwyň başdan geçirmeleri” filmine, iň gowy ssenariý baýragy bolsa fransuz režissýory Emmanuel Marrere “Biziň halas bolmagymyz” filmi üçin berildi.
Aktýorlyk baýraklary hem paýlaşyldy. Iň gowy erkek keşbi baýragy belgiýaly režissýor Lukas Dontyň režissýorlyk eden “Gorkak” filmindäki işleri üçin Walentin Kampane we Emmanuel Maççia berildi. Wirjiniýa Efira we Tao Okamoto ýapon režissýory Rýusuke Hamagutiniň “Birdenkä” filmindäki keşpleri üçin iň gowy aktrisa diýlip yglan edildi.
79-njy Kann kinofestiwaly 12-23-nji maý aralygynda geçirildi. Şu ýyl esasy bäsleşikde baýraklar ugrunda 22 film bäsleşdi.
