Xiaomi kompaniýasy Hytaýda sygymy 8000 mA/sag bolan akkumulýator, Snapdragon 8 Elite Gen 5 prosessory we 200 Mp esasy kamera bilen enjamlaşdyrylan Xiaomi 17 Max flagman smartfonynyň tanyşdyrylyşyny geçirdi.
Smartfon 100 Wt kuwwatly simli zarýad beriş ulgamyny, 50 Wt kuwwatly simsiz zarýad berşi we 100 Wt PPS protokolyny goldaýar. Gurluşda Surge P3 çalt zarýad beriş çibi we Surge G2 batareýany dolandyryş kontrolleri ulanylýar.
Xiaomi 17 Max smartfony 2K durulygyndaky, 120 Gs çenli täzelenme ýygylykly we iň ýokary ýagtylygy 3500 kd/m² bolan 6,9 dýuýmlyk OLED displeýine eýe boldy. Ekran üçünji nesil Dragon Crystal Glass aýnasy bilen goralýar.
Smartfonyň özenini LPDDR5X operatiw ýady we UFS 4.1 saklaýjysy bolan Qualcomm Snapdragon 8 Elite Gen 5 prosessory düzýär. Şeýle hem enjamda meýdany 5500 mm² bolan bug kameraly sowadyş ulgamy göz öňünde tutuldy.
Esasy Leica kamerasynda 200 Mp HP9 sensory ulanylýar. Mundan başga-da, smartfon 50 Mp ultra-giňburçly kamera we üç esse optiki zumly 50 Mp periskopik modul bilen enjamlaşdyrylandyr. Öňdäki kameranyň durulygy bolsa 32 Mp barabar.
Smartfon Wi-Fi 7, Bluetooth 5.4, NFC ýaly ulgamlary, ters simsiz zarýad berşi we suwdan-tozandan goranmak boýunça IP69 standartyny goldaýar. Gurluş Android 16 operasiýa ulgamynyň esasyndaky HyperOS 3.0 ulgamynda işleýär.
Xiaomi 17 Max smartfonynyň bahalary:
- 12/256 Gbaýt — 4299 ýuan (takmynan, $630);
- 16/256 Gbaýt — 4599 ýuan (takmynan, $675);
- 12/512 Gbaýt — 4899 ýuan (takmynan, $720);
- 16/512 Gbaýt — 5299 ýuan (takmynan, $780).
