Alymlar ukusyz gijeden soň goşmaça uklamagyň ukusyzlygyň täsirini bölekleýin gowşadyp biler, ýöne onuň ýetiren zyýanynyň öwezini doly dolduryp bilmez diýen netijä geldiler. Nature Communications žurnalynda çap edilen makala şu meselä bagyşlanan.
Sinhua uniwersitetinden ukyny öwreniji barlagçy Sýaoýu Li tarapyndan ýolbaşçylyk edilýän topar Britaniýanyň biobankynda 85 müňden gowrak gatnaşyjynyň 574 müňden gowrak gijeki ukusyny seljerdi. Bir hepdäniň dowamynda gatnaşyjylar ukylarynyň dowamlylygyny ýazga almak üçin akselerometrleri dakyndylar.
Gatnaşyjylar ortaça her gije 6,43 sagat ukladylar. Olaryň 30% -ine uky ýetmezçilik edýärdi - olar adatdakylaryndan az ýa-da öz ýaşlary we jynsy üçin maslahat berilýän derejeden az ukladylar. Olaryň ýarysy soňra takmynan bir sagat köp ukladylar.
Ýaşyny, durmuş ýörelgesini we beýleki faktorlary hasaba alanlaryndan soň, alymlar ukusyny yzygiderli ýeterlik almaýan we onuň öwezini dolmadyk adamlaryň indiki sekiz ýylyň dowamynda, ýeterlik derejede ukusyny alýanlara garanyňda, saglyk howpunyň 15% ýokarydygyny anykladylar. Bu täsir, esasanam, her gije ortaça 5,7 sagat uklaýan gatnaşyjylarda has aýdyň boldy.
Mundan başga-da, gije az ýatyp, ukudan ganmadyk adamlar goşmaça uklanlaryndan soň, töwekgelçiligiň görkezijileri ukusy kadaly gatnaşyjylaryň derejesine golaý boldy.
Barlagyň awtorlary dikeldiji ukynyň ýiti uky ýetmezçiliginiň öwezini bölekleýin dolup biljekdigini, ýöne dowamly uky ýetmezçiliginiň saglyk üçin çynlakaý töwekgelçilik faktory bolmagynda galýandygyny bellediler.
