Jekson Pollogyň «Number 7A, 1948» atly suraty Nýu-Ýorkdaky «Christie’s» auksionynda 181,2 million dollara satyldy. Bu suratkeşiň işleri üçin täze rekorddyr.
Surat agşamky söwdalaryň esasy loty boldy. Ol deslapdan 100 million dollara bahalandyrylypdy. «Artnet News-iň» maglumatlaryna görä, surat ugrunda alty adam bäsleşdi, ýeňiji bolsa telefon arkaly baha kesdi. Onuň ady aýan edilmeýär.
Pollok «Number 7A-ny» 1948-nji ýylda 36 ýaşynda döretdi. Iş boýagyň mata sepilýän ýa-da guýulýan «dripping» usulynda ýerine ýetirilen ilkinji eserleriň biri hasaplanýar. Suratyň ölçegi inine takmynan 3,3 metr we beýikligine 1 metre golaýdyr.
Eser ozal 2017-nji ýylda aradan çykan media-magnat S.I. Nýuhausa degişli eken. Ol suraty 2000-nji ýylda «Sotheby’s-iň» öňki eýesi A. Alfred Taubmandan satyn alypdy. Pollogyň öňki auksion rekordy 61,2 million dollar bolup, ol 2021-nji ýylda goýlupdy.
«Christie’s» agşamyň dowamynda jemi üç sagada golaý wagtyň içinde 1 milliard dollardan gowrak çeperçilik eserlerini satdy. Nýuhausyň kolleksiýasyndan satylan on alty eser 630,8 million dollar getirdi.
Başga uly satuwlaryň hatarynda Konstantin Brankuziniň 1913-nji ýylda döreden bürünç kelle heýkeli «Danaïde» 107,6 million dollara, Mark Rotkonyň «No. 15 (Two Greens and Red Stripe)» suraty bolsa 98,4 million dollara satyldy. Bu netijeleriň ikisi hem awtorlar üçin rekord bolup durýar.
