Romen Gawrasyň režissýorlyk etmeginde Luwr muzeýinde bolup geçen talaňçylyk ekrana geçiriler. Bu barada «Le Figaro» neşiri habar berýär.
Režissýor filmi Žan-Mişel Dekuži, Žeremi Fam-Le we Nikola-Şarl Torrentiň «Main basse sur le Louvre» («Luwrdan eliňi çek») atly kitabynyň esasynda düşürer. Kitap okyjyny «gizlin resminamalara we haýran galdyryjy hasabatlara» esaslanýan talaňçylygyň taryhyna alyp gitmegi wada berýär.
Häzirki wagtda Romen Gawras filmiň adyny, aktýorlaryň düzümini we ekrana çykjak senesini mälim etmedi.
«Le Film français» neşiriniň habar bermegine görä, Romen Gawras ssenarini Saýmon Žake («Pariž, men seni söýýärin») we Murad Winter («Söýgi aşa bahalandyrylan») bilen bilelikde ýazmaga başlady. Režissýor prodýuser hökmünde «Iconoclast» kompaniýasyny işe çekdi, ol bu kompaniýa bilen 2022-nji ýylda Wenesiýa kinofestiwalynda iki sany baýraga mynasyp bolan «Afina» filminiň üstünde işläpdi.
Belläp geçsek, 2025-nji ýylyň oktýabrynda Luwr muzeýi bary-ýogy ýedi minutyň içinde talandy. Ogrular muzeýden Napoleonyň we imperatoryň aýaly Žozefinanyň kolleksiýasyndan gymmatbaha şaý-sepleri hem-de beýleki gymmatlyklary alyp gaçdy. Ogurlykdan soň, Luwrdaky Apollon galereýasynyň aşagynda imperatoryň aýaly Ýewgeniýanyň zeper ýeten täji tapyldy. Luwr ony dikeltmek işlerine başlady.
