Türkmenistanyň ýygyndy topary Türkiýäniň Antalýa şäherinde geçirilen kontakt jiu-jitsu boýunça dünýä çempionatynda 42 medal gazanyp, toparlaýyn hasapda birinji ýeri eýeledi.
Ýaryş Halkara jiu-jitsu federasiýasynyň (JJIF) howandarlygynda guralyp, oňa 16 ýurtdan 245 türgen gatnaşdy.
Ýaryşyň netijelerine görä, türkmen türgenleri 14 altyn, 11 kümüş we 17 bürünç medal gazandy. Medallaryň sany boýunça ikinji orny 14 altyn, 3 kümüş we 2 bürünç bilen Wýetnamyň ýygyndysy eýeledi. Üçünji ýere bolsa 10 altyn, 13 kümüş we 16 bürünç medal gazanan Gazagystanyň topary mynasyp boldy.
Türkmenistandan bolan birnäçe türgen birwagtda birnäçe ugurlarda we dürli ýaş kategoriýalarynda çykyş etdi.
JJIF-iň howandarlygyndaky jiu-jitsu boýunça dünýä çempionaty 1994-nji ýyldan bäri her iki ýyldan bir gezek geçirilýär. «Kontakt jiu-jitsu» ugry bolsa ýaryşlaryň maksatnamasyna 2017-nji ýylda girizildi.
