Gresiýanyň Ion deňzinde ýerleşýän «Makri» atly hususy ada noýabr aýynda geçiriljek auksionda 247 müň ýewro başlangyç baha bilen satuwa çykarylar. Haýran galmaly ýeri, bu adany 2022-nji ýylda 8 million ýewro satjak bolupdylar, emma gurluşyk gadagançylyklary sebäpli baha örän pese düşüpdir.
Tokaý zolagyna degişli adanyň Ýewropanyň «Natura 2000» tebigaty goramak ulgamynyň gözegçiliginde durýandygy we şol sebäpli bu ýerde uly otelleri, kurortlary we beýik binalary gurmagyň düýbünden gadagandygy onuň bahasynyň birden arzanlamagyna getirdi.
Şunlukda adany satyn aljak adama diňe oba hojalygy bilen meşgullanmaga we tebigata zeper ýetirmeýän uly bolmadyk gurluşyklary etmäge rugsat berilýär. Häzirki wagtda adada diňe köne we taşlanyp gidilen çaklaňja jaý, kiçi buthana we suw saklanýan sardoba bar.
Ýerli metbugatyň ýazmagyna görä, adada syýahatçylyk telekeçiligini gurmak isleýän baý maýadarlar ondaky gadagançylyklary eşidip, satyn almakdan ýüz öwüripdirler.
Emma dünýäde hususy adalary kireýine almak henizem meşhurlygyny ýitirenok. Mysal üçin, Gresiýanyň özünde «Turquoise Private Island», Ispaniýada Ibizanyň golaýyndaky «Tagomago», şeýle hem Maldiwlerde we Karib deňzinde baýlar üçin ýörite kireýine berilýän adalar diýseň köp. Olaryň iň meşhury bolsa, milliarder Riçard Brensona degişli bolan «Necker Island» adasydyr.
Gresiýada bir uly jaýyň bahasyna bütiuir adany satyn alyp bolýar, ýöne ol ýerde adaty durmuşda diňe tebigata guwanyp ýaşaýmasaň, uly telekeçilik gurmaga rugsat ýok.
