Sotheby’s auksion öýi häzire çenli tapylan iň uly we doly derejeli tirannozawr skeletleriniň birini satuwa çykarar. Gas atly bu tapyndynyň bahasy 20–30 million dollar aralygynda bahalandyrylýar. Bu barada «Artnet News» neşiri habar berýär.
Söwda 14-nji iýulda Nýu-Ýorkda, tebigy taryh auksionynyň çäklerinde geçiriler. Sotheby’s-yň maglumatyna görä, bu görkeziji dinozawrlaryň skeletleri üçin häzire çenli bellenilen iň ýokary ilkinji bahadyr.
Tapyndynyň ýaşy, takmynan, 67 million ýyla barabar. Galyndylar Günorta Dakota ştatynyň Harding okrugynyň çäginde, merhum Geri «Gas» Likingiň mülkünde tapyldy. Ol birnäçe ýylyň dowamynda öz ýerinden aýratyn süňk böleklerini we dişleri tapypdy, şondan soň 2021-nji ýylda bu gözleg işlerine Theropoda Expeditions hünärmenler topary goşuldy.
Gazuw-agtaryş işleri 2021-nji ýyldan 2023-nji ýyla çenli, üç tomus möwsüminde dowam etdi. Soňra galyndylar arassalamak, anyklamak we kataloglaşdyrmak üçin ýörite barlaghana iberildi. Skelet işler başlanandan bir ýyl soň aradan çykan Likingiň hormatyna atlandyryldy.
Gas jemi 183 sany gazylyp alnan süňk böleklerinden ybarat. Olaryň arasynda örän gowy saklanan kelleçanak, iki daban we seýrek duş gelýän egin süňkleri bar. Sotheby’s tarapyndan berlen baha boýunça, skelet, takmynan, 63% durşuna saklanypdyr. Süňkleriň käbirinde biten döwükleriň we dişlemeleriň yzlary görünýär.
Ýygnalan skeletiň uzynlygy, takmynan, 11,5 metre, beýikligi bolsa 3,8 metre ýetýär. Ölçegleri we saklanyş derejesi boýunça Gas mundan ozal auksionlarda satylan Sten we Sýu atly tirannozawrlar bilen deňeşdirilýär.
Söwdanyň öňüsyrasynda skelet 1-nji iýuldan 14-nji iýul aralygynda Nýu-Ýorkdaky Broýer binasynda köpçülige görkeziler.
