Syroscats haýwanlary goramak guramasy Gresiýanyň Siros adasynda işlemek üçin 2027-nji ýyl boýunça meýletinçileri hasaba alyp başlajakdygyny yglan etdi. Maksatnama gatnaşyjylar pişiklere seredendikleri üçin mugt ýaşaýyş jaýy, ertirlik nahary we jemagat hyzmatlarynyň tölegleri üpjün ediler. Bu barada Bild habar berýär.
Arzalary kabul etmek işi sentýabr aýynda başlar. Talap edilýän esasy şerte görä, dalaşgärler hepdede bäş güni, günde bolsa takmynan bäş sagady pişiklere ideg etmäge bagyşlamalydyrlar.
Gurama adada azyndan bir ýarym aý ýaşamaga we özbaşdak işlemäge taýyn bolan, ýaşy 25-den geçen ýekebara meýletinçileri ýa-da maşgala jübtüni (är-aýallary) gözleýär. Weterinaryň kömekçisi bolup işlän ýa-da meýdan pişiklerine seretmekde tejribesi bolanlara artykmaçlyk berler, şol bir wagtda hünär taýdan taýýarlygy bolmadyklaryň hem arza tabşyrmaga hukugy bardyr.
Maksatnamada pul görnüşindäki hak-heşdek göz öňünde tutulmaýar. Gatnaşyjylar gündelik borçlaryny berjaý edenlerinden soň, boş wagtlaryny syýahatçy hökmünde geçirip bilerler.
Siros adasy Egeý deňzinde ýerleşýär we Gresiýanyň syýahatçylar tarapyndan iň az dyknyşyk döredilýän adalarynyň biri hasaplanylýar. Bu ýerde ajaýyp çägeli kenarlar, kiçijik aýlaglar, taryhy arhitektura, kofehanalar we restoranlar bar.
