«Collider» neşiri HBO-nyň soňky on ýylyň dowamynda çykarylan iň gowy 12 serialynyň reýtingini hödürledi. Sanawyň birinji ornuny «Çernobyl» mini-serialy eýeledi.
«HBO elmydama abraýly telewizion önümleriň nusgasy bolup geldi. Telekanal şeýle abraýy özüniň ýokary maksatly beýan edijiligi arkaly gazandy, munda esasy maksat — tomaşaça ýöne bir göwün açyjy şüweleňden has uly zady hödürlemekdir. Elbetde, HBO-nyň “Sopranolar” (The Sopranos) we “Söweş arkadaşlary” (Band of Brothers) ýaly klassyky seriallary bütinleý başga bir derejededir, ýöne soňky 10 ýyl HBO üçin öwrülişikli döwür boldy» – diýip, neşiriň awtorlary ýazýar. «Collider-iň» pikiriçe, soňky ýyllarda kanalyň taslamalary has batyrgaý hem-de çuňňur oýlanmalara baý boldy, hekaýalaryň özi bolsa has çylşyrymly we oňaýsyz temalara ýygy-ýygydan girişip başlady.
Reýtingiň lideri barada aýdylanda, «Collider» «Çernobyl» serialynyň taryhy drama we ädimleýin horror elementlerini özünde birleşdirip, Çernobyl AES-indäki heläkçilige getiren institusional şowsuzlyklaryň we syýasy çözgütleriň netijelerini öwrenýändigini ýazýar.
«HBO-nyň mini-serialy 1986-njy ýylyň aprelinde bolup geçen weýrançylykly ýadro heläkçiligi barada gürrüň berýär, ýöne döredijileri bolup geçýän zatlaryň diňe bir mehanikasy gyzyklandyrmaýar. Tankytçylar tarapyndan ýokary baha berlen bu serial elhenç waka sebäp bolan syýasy çözgütleri we geleňsizlikleri derňeýär» – diýip, reýtingi düzenler belleýär.
«Collider» neşiri boýunça, iň gowy 12 HBO serialynyň sanawy:
- «Çernobyl» (Chernobyl, 2019)
- «Bizden biri» (The Last of Us, 2023 — häzirki wagt)
- «Sakçylar» (Watchmen, 2019)
- «Mirasdüşerler» (Succession, 2018 — 2023)
- «Pitt» (Pitt, 2025 — häzirki wagt)
- «Gijeleriň birinde» (The Night Of, 2016)
- «Aždarhanyň öýi» (House of the Dragon, 2022 — häzirki wagt)
- «Barri» (Barry, 2018 — 2023)
- «Isttaunly Meýr» (Mare of Easttown, 2021)
- «Ak lotos» (The White Lotus, 2021 — häzirki wagt)
- «Uly kiçijik ýalan» (Big Little Lies, 2017 — 2026)
- «Ýiti zatlar» (Sharp Objects, 2018)
