Awstraliýaly alymlar plastik çaýnekleriň suw gaýnadylanda millionlarça mikro we nanobölejikleri bölüp çykaryp biljekdigini anykladylar.
Bu barlagyň netijeleri NPJ Emerging Contaminants žurnalynda çap edildi. Alymlar sekiz polipropilenden ýasalan çaýnekde gaýnadylan suwy seljerdiler we enjamyň ilkinji gezek ulanylanda hasam köp bölejik bölüp çykarýandygyny anykladylar.
Awtorlar onda ilkinji gezek suw gaýnadylanda, bir millilitr suwda takmynan 12 million plastik bölejikleriniň bolup biljekdigini aýdýarlar. Barlagçylaryň hasaplamalaryna görä, standart bir käse çaýda takmynan 3 milliard plastik bölejigi bolup biler.
Bilermenler suw köp gezek gaýnadyp dökülenden soň, bölejikleriň sanynyň azalandygyny anykladylar. On gezekden soň, zyňyndylaryň derejesi ep-esli azaldy, elli gezekden soň bolsa hasam seýrekledi, emma bölejikler doly ýitip gitmedi.
Şeýle hem, barlagçylar düzüminde köp mineral saklaýan gaty suwuň çaýnegiň içki diwarlarynda çökündi gatlagyny emele getirmek arkaly, plastigiň düşmegini bölekleýin azaldyp biljekdigini bellediler.
Hatda 150 gezek gaýnadylandan soň hem, bilermenler suwuň her millilitrine takmynan 820 000 bölejigiň düşýändigini hasaba aldylar. Şol bir wagtyň özünde, alymlar plastigiň şeýle konsentrasiýasynyň adam saglygyna nä derejede täsiriniň bardygyna heniz anyk baha berip bilmeýändiklerini nygtaýarlar.
