Dünýäniň birinji raketkasy Ýannik Sinner Rimde geçirilen ATP «Masters» seriýasynyň ýaryşynyň ýeňijisi boldy. Ol finalda norwegiýaly Kasper Ruudy 6:4, 6:4 hasabynda utmagy başardy.
24 ýaşly italiýaly tennisçi üçin bu titul ATP 1000 seriýasynyň ýaryşlarynda yzygiderli altynjy tituly boldy. Bu bolsa 1990-njy ýylda «Masters» kategoriýasy döredileni bäri rekord görkezijidir. Mundan öňki iň gowy netije yzygider gazanylan dört ýeňiş bolup, ol Nowak Jokowiçe we Rafael Nadala degişlidi.
Şeýle-de, Sinner Jokowiçden soň «Altyn karýera Mastersini» jemlemegi başaran ikinji tennisçi boldy — ol ATP 1000 tapgyrynyň dokuz ýaryşynyň hersinde azyndan bir gezek ýeňiş gazandy.
Rimdäki ýeňiş italiýaly türgen üçin ATP 1000 ýaryşlarynda yzygider 34-nji ýeňiş boldy. Ol 2011-nji ýylda bu kategoriýaly ýaryşlarda yzygider 31 ýeňiş gazanan Jokowiçiň rekordyny täzelemegi başardy.
Häzirki wagtda Sinneriň hasabynda ýekelikde 29 ATP tituly bar. Ol 2026-njy ýylda Indian-Wellsdäki, Maýamidäki, Monte-Karlodaky, Madriddäki we Rimdäki «Masters» ýaryşlarynda ýeňiş gazandy, şeýle hem geçen möwsümi Parizdäki ýaryşda ýeňiş gazanmak bilen tamamlady.
