Bolgariýaly aýdymçy Dara 70-nji «Ýewrowideniýe» aýdym-saz bäsleşiginiň ýeňijisi boldy. Ýubileý bäsleşigi Awstriýanyň paýtagty Wena şäherinde geçirildi.
Dara özüniň «Bangaranga» atly dens-pop aýdymy bilen jemi 516 bal toplady. Ol milli eminleriň we teletomaşaçylaryň bilelikdäki ses bermeginiň netijeleri boýunça birinji orny eýeledi.
Ahyrky sanawda ikinji orny «Michelle» aýdymy bilen ysraýylly aýdymçy Noam Bettan eýeledi. Bu aýdym üç dilde — iňlis, fransuz we iwrit dillerinde ýazyldy.
Sesleriň netijeleri yglan edilýän wagty Ysraýyl tomaşaçylaryň ses bermegi netijesinde garaşylmadyk ýagdaýda öňe saýlandy. Tomaşaçylar oňa 343 bal getirdi we ol uzak wagtlap öňdebaryjylygy saklady, sebäbi eminleriň sesleri boýunça öňde barýan Bolgariýanyň netijeleri iň soňunda yglan edildi.
Gyzykly ýeri, bukmekerleriň we hünärmenleriň öňünden çaklamalary ýerine düşmedi: bäsleşik başlamanka şu ýylyň esasy faworiti hökmünde finlýandiýaly Linda Lampeniws we Pete Parkkonen dueti görkezilipdi, lider bolup biljek ilkinji üçlüge bolsa grek aýdymçysy Akilas (Akilas Mitilineos) we awstraliýaly ýerine ýetiriji Delta Gudrem dagy girizilipdi. Sesleriň iň soňky hasaplamasyna görä, Finlýandiýa altynjy orny eýeledi, Awstraliýa dördünji setirde ýerleşdi, Gresiýa bolsa iň güýçlüleriň onlugyny jemledi.
