OpenAI kompaniýasy ChatGPT üçin «Plaid» platformasy arkaly ulanyjylaryň bank hasaplaryny birikdirmäge mümkinçilik berjek täze funksiýany yglan etdi.
Birikdirilenden soň, çat-bot hasaplaryň balansyny, tranzaksiýalaryň taryhyny, işjeň abunalyklary, maýa goýum portfelini, ipotekany we karz kartlary boýunça bergileri görüp biler. Şol bir wagtda kompaniýa ChatGPT-niň hasaplar boýunça hiç hili amallary geçirip bilmejekdigini we bank kartlarynyň hem-de akkauntlaryň doly belgilerine elýeterlilik almajakdygyny nygtaýar.
OpenAI täze funksiýany şahsy maliýe kömekçisi hökmünde görkezýär. Ulanyjylar býujeti meýilleşdirmek, uly göwrümli söwdalar, kreditler we çykdajylar barada sowallary berip biler.
Ilkinji tapgyrda bu funksiýa diňe ABŞ-da aýda 200 dollarlyk ChatGPT Pro nyrhnamasyny ulanyjylar üçin elýeterli bolar. Geljekde kompaniýa bu elýeterliligi Plus we beýleki derejeli müşderiler üçin hem giňeltmegi meýilleşdirýär.
Şeýle-de, OpenAI ulanyjylaryň bank akkauntlaryny öçürip, ChatGPT-niň maliýe ýadyny bozup biljekdigini, şeýle hem maliýe maglumatlaryny emeli aň modellerini okatmak üçin ulanmagy gadagan edip biljekdigini mälim etdi.
Muňa garamazdan, kompaniýa şeýle maglumatlaryň saklanylyşy we goşmaça gorag gurallary barada giňişleýin aýtmady. Bu funksiýanyň işe girizilmegi OpenAI kompaniýasynyň ChatGPT-ni hemmetaraplaýyn şahsy kömekçi hökmünde ösdürmek strategiýasynyň bir bölegi boldy. Mundan öň kompaniýa lukmançylyk maslahatlary üçin ChatGPT Health režimini hödürläpdi.
