Amerikan aktýory Jon Trawolta kinematografiýa goşan goşandy üçin Kann kinofestiwalynyň «Altyn palma şahasy» hormat baýragyna mynasyp boldy. Bu baýragyň gowşuryljakdygy barada öňünden habar berilmändi.
Bu garaşylmadyk çözgüt barada festiwalyň baş direktory Týerri Fremo «France Info» telekanaly tarapyndan ýaýlyma berlen dabarada mälim etdi.
«Bu baýrak “Oskardan” has ýokarydyr. Ynanyp bilemok, muňa düýbünden garaşmandym» — diýip, Trawolta baýragy alandan soň aýtdy.
72 ýaşly aktýor festiwalda özüniň ilkinji režissýorlyk işi bolan «Gijeki uçuş» («Propeller One-Way Night Coach», 2026) filmini görkezdi.
Jon Trawolta 1954-nji ýylda ABŞ-da futbolçynyň we aýdymçynyň maşgalasynda dünýä indi. Aktýor halkara derejesindäki meşhurlyga 1970-nji ýyllarda çykan «Şenbe agşamynyň heseri» («Saturday Night Fever», 1977) we «Briolin» («Grease», 1978) filmlerinden soň eýe boldy.
Trawoltanyň meşhurlygynyň täze tapgyry bolsa 1990-njy ýyllarda Kwentin Tarantinonyň «Jenaýatçylyk edebiýaty» («Pulp Fiction», 1994) filmine gatnaşmagyndan soň başlandy. Aktýor öz karýerasy boýunça 80-den gowrak filmde surata düşdi, iki gezek «Oskar» baýragyna dalaşgär görkezildi we 1995-nji ýylda «Keltäni tapmak» («Get Shorty», 1995) komediýasyndaky roly üçin «Altyn globus» baýragyny aldy.
