Seýrek duşýan «Ocean Dream» göwheri oturdylan ýüzük Ženewada geçirilen Christie’s auksionynda 13,57 million şweýsar frankyna (takmynan, 17,37 million dollar) satyldy.
Söwdalar Kaşaňlyk hepdeliginiň çäginde geçirilip, 20 minut töweregi dowam etdi. Auksion öýüniň berýän maglumatyna görä, bu haryt auksion taryhynda häzire çenli satylan iň gymmat ýiti gök-ýaşyl reňkli göwher boldy. Şeýle-de, ol Ženewadaky häzirki Kaşaňlyk hepdeliginiň iň gymmat bahaly predmeti hökmünde hasaba alyndy.
Ýüzügiň merkezinde agramy 5,5 karat bolan üçburçluk görnüşli göwher ýerleşýär. Onuň daşyny romb görnüşinde ýonulan ýigrimä golaý ak göwher gurşaýar.
Christie’s-iň wekilleriniň habar bermegine görä, bu daş 1990-njy ýyllarda Merkezi Afrika Respublikasynda tapyldy. Smitson instituty reňkiniň we durulygynyň utgaşmasy boýunça ony dünýäniň iň seýrek sekiz almazynyň sanawyna girizdi.
Mundan ozal hem «Ocean Dream» auksiona çykarylypdy. Bu ýüzük ilkinji gezek 2014-nji ýylyň maýynda Ženewada 7,7 million şweýsar frankyna satyldy.
