Gazagystanyň Prezidenti emeli aň tehnologiýalaryny orta bilim ulgamyna ornaşdyrmak baradaky Permana gol çekdi. Resminama mekdeplerde emeli aňy tapgyrlaýyn ulanmagy we okatmagyň täze usullaryny işläp taýýarlamagy göz öňünde tutýar.
Permana laýyklykda, hökümet 2026-njy ýylyň 1-nji iýulyna çenli 2026–2029-njy ýyllar üçin toplumlaýyn meýilnamany tassyklamaly. Ol şahsylaşdyrylan okuw gurallaryny döretmegi, sanly infrastrukturany ösdürmegi, mugallymlary taýýarlamagy we okuwçylaryň şahsy maglumatlaryny goramak çärelerini öz içine alýar.
Resminamada emeli aň ulgamy boýunça hytaýly hünärmen Li Kaý-Funuň teklipleri aýratyn bellenilip geçilýär. 2026-njy ýylyň 1-nji iýunyna çenli hökümet orta bilim ulgamynda synag taslamasyny durmuşa geçirmek we soňra bu maksatnamany giňeltmek boýunça tekliplerini hödürlär. Bu başlangyjyň şäher we oba mekdepleriniň arasyndaky bilimiň hil tapawudyny azaltmaga ýardam etmegine garaşylýar.
2026-njy ýylyň 1-nji awgustyna çenli synag taslamasyna gatnaşýan mekdepleri zerur bolan tehniki enjamlar we durnukly ýokary tizlikli internet bilen üpjün etmek meýilleşdirilýär.
Mundan başga-da, 2026-njy ýylyň 1-nji sentýabryna çenli Gazagystanda emeli aňy orta bilim ulgamynda ulanmagyň standartlary tassyklanmaly. Şol möhlete çenli mugallymlaryň hünär derejesini yzygiderli ýokarlandyrmak boýunça hem çäreleriň görülmegi göz öňünde tutulýar. Permanda emeli aňyň diňe goşmaça gural hökmünde görülýändigi we onuň mugallymlaryň ornuny tutmaly däldigi aýratyn nygtalýar.
