Meşhur repçi Kanýe West awtorlyk hukuklaryny bozandygy baradaky kazyýet işinde ýeňildi diýip, The Guardian neşiri habar berdi.
Kazyýet sazandany 2018-nji ýylda Halil Abdul-Rahman, Sem Barş, Joş Mis we Den Siff tarapyndan döredilen «MSD PT2» atly instrumental sazyň bölegini bikanun ulanmakda aýyplady.
Metbugatda ýazylyşyna görä, West bu sazy bir prodýuser arkaly alyp, özüniň «Hurricane» atly aýdymynda ulanypdyr. Sazyň hakyky eýeleri aýdymyň soňky nusgasynda awtor hökmünde görkezilipdir, ýöne repçi aýdym resmi taýdan çykmazdan ozal, onuň deslapky nusgasyny özüniň «Donda» albomynyň tanyşdyrylyş dabarasynda ulanypdyr.
Şeýlelikde sazyň eýeleri repçiniň bu çärede öz sazlaryny ulanandygy üçin pul tölemelidigini öňe sürdüler. Çünki şol dabarada satylan biletler Kanýe Weste gowy girdeji getiripdi. Mundan başga-da, dabara gelen myhmanlar Kanýe tarapyndan taýýarlanan ýörite eşikleri we beýleki harytlary satyn alypdyrlar.
Kazyýet repçiniň kompozitorlara alty belgili (azyndan 100 müň dollar) öwezpuly tölemelidigi barada karar çykardy. Westiň wekilleri bolsa, bu puluň mukdarynyň awtorlaryň garaşan we talap eden çykdajysyndan has az bolandygyny aýtdylar. Kazyýet mejlisine sazandanyň özi hem gatnaşdy. Ol öz çykyşynda:
– Men adamlara hakyky mynasyp bolan zatlaryny berýändigime buýsanýaryn. Ýöne häzir köp adamyň menden peýdalanjak bolýandygyny-da aňýaryn. Şu gün kazyýet jaýynda otyrkam, adamlaryň diňe meniň adymyň üsti bilen gazanyp bilişlerinden-de has köp pul gazanjak bolýandyklary barada oýlandym – diýip, köpmanyly bellik etdi.
