Meşhur režissýor Piter Jekson «Tintiniň başdan geçirmeleri» filminiň dowamynyň üstünde işleýändigini we ssenariýany Fren Uolş bilen bilelikde ýazýandygyny habar berdi.
Režissýor bu taslama barada Kann kinofestiwalynyň dowamynda geçirilen «Rendez-Vous» duşuşygynda gürrüň berdi. Jeksonyň aýtmagyna görä, ssenariýanyň üstündäki işler hatda onuň Kann şäherindäki sapary wagtynda hem dowam edýär.
Jekson mundan ozal Stiwen Spilberg bilen özara ylalaşandyklaryny ýatlatdy. Şol ylalaşyga görä, birinji filmi Spilberg, ikinjisini bolsa Jekson düşürmelidi. 2011-nji ýylda Spilberg «Tintiniň başdan geçirmeleri: «Ýekeşahyň» syry» atly filmi çykardy we onda Jekson prodýuser hökmünde çykyş edipdi.
«Tintiniň başdan geçirmeleri» belgiýaly suratkeş Erženiň komiksler seriýasyna esaslanýar. Filmiň baş gahrymany Tintin atly habarçy bolup, ol Milu atly iti bilen bilelikde dürli syrly wakalary yzarlaýar.
Şeýle hem duşuşygyň dowamynda Jekson näme üçin «Ýüzükleriň hökümdary: Gollumyň awy» filminiň režissýory bolmandygyny we bu işi näme sebäpden Endi Serkise tabşyrandygyny düşündirip şeýle diýdi:
– Bu Gollumyň psihologiýasy we onuň bagly taraplary baradaky içgin hekaýatdyr. Bu Gollumyň şahsy durmuşy barada. Endi bu gahrymany hemmelerden gowy tanaýar. Bu filmiň iň gyzykly görnüşi diňe Endi Serkis düşüren ýagdaýynda emele geler.
79-njy Kann kinofestiwalynyň açylyş dabarasynda režissýora hormatly «Altyn palma şahasy» gowşuryldy. Sylagy oňa «Ýüzükleriň hökümdary» trilogiýasynda Frodo Begginsiň keşbini janlandyran Elýa Wud gowşurdy.
