Nvidia bazar bahasyny (kapitalizasiýasyny) 5,5 trillion dollardan geçiren taryhda ilkinji jemgyýetçilik kompaniýasy boldy.
13-nji maýda geçirilen söwdalarda emeli aň (EA) çiplerini öndürijiniň paýnamalary takmynan 3% ýokarlandy. Bahalaryň gymmatlamagy Nvidia-nyň ýolbaşçysy Jensen Huanyň ABŞ-nyň Prezidenti Donald Trampyň Hytaýa boljak saparyna goşulmagy we ol ýerde HHR-iň başlygy Si Szinpin bilen gepleşikleriň geçirilmegine garaşylmagy bilen baglanyşdyrylýar.
Habar beriş serişdeleriniň maglumatyna görä, Tramp Huany wekiliýetiň düzümine «iň soňky pursatda» goşupdyr.
Bu ösüşiň netijesinde Nvidia beýleki tehnologiýa äleminiň ägirtlerinden arany has-da açdy: Google: takmynan 4,7 trillion dollar; Apple: 4,3 trillion dollar.
Soňky bir aýyň dowamynda Nvidia-nyň paýnamalary takmynan 20% ýokarlandy. Mart aýynyň ahyrynda paýnamalar 165 dollar töweregi bahadan satylan bolsa, häzirki wagtda olaryň bahasy 220 dollardan geçýär. Ýyllyk hasapda ösüş takmynan 74%-e deňdir.
Çaklamalara görä, Huanyň şahsy baýlygy takmynan 5,4 milliard dollar artyp, 196 milliard dollara ýetdi.
Maýadarlar emeli aň infrastrukturasyna bolan islegiň artmagyna garaşýarlar. Geljek hepde Nvidia özüniň çärýeklik hasabatyny çap eder. Kompaniýa girdejisiniň geçen çärýekdäki 68 milliard dollardan 78 milliard dollara çenli ýokarlanmagyna garaşýar. Bellenişi ýaly, girdejiniň 91%-inden gowragyny maglumat merkezleri we EA-tizlendirijileri üpjün edýär.
Ösüşiň goşmaça faktory hökmünde iri IT-kompaniýalaryň EA taslamalaryna goýýan maýa goýumlary görkezilýär. Mysal üçin, Meta kompaniýasy hasaplama güýçlerini we EA-infrastrukturasyny ösdürmek üçin 125 milliard dollardan 145 milliard dollara çenli serişde sarp etmegi meýilleşdirýändigini mälim etdi.
