Tokio şäherinde Halkara ynsanperwer ylymlary we ösüş uniwersitetiniň ýolbaşçylary bilen Tokio daşary ýurt dilleri uniwersitetiniň prezidentiniň arasynda duşuşyk geçirildi. Türkmenistanyň Bilim ministrliginiň habar bermegine görä, taraplar ýokary okuw mekdepleriniň arasyndaky hyzmatdaşlygy mundan beýläk-de ösdürmek meselelerini ara alyp maslahatlaşdy.
Gepleşikler iki ýokary okuw mekdebiniň arasynda 2015-nji ýylda gol çekilen özara düşünişmek baradaky Ähtnama esasynda geçirildi. Taraplar akademiki alyş-çalyşlary giňeltmek, bilelikdäki bilim başlangyçlary, ylmy hyzmatdaşlygy ösdürmek we halkara derejeli hünärmenleri taýýarlamakda tejribe alyşmak meselelerine seretdi.
Talyplaryň we mugallymlaryň akademiki hereketliligine aýratyn üns berildi. Halkara ynsanperwer ylymlary we ösüş uniwersitetiniň prorektory N.Şyhlyýew ýapon ýokary okuw mekdebi bilen hyzmatdaşlygyň yzygiderli häsiýete eýedigini hem-de talyplaryň bilim we hünär taýýarlygynyň hilini ýokarlandyrmakda bilelikdäki maksatnamalaryň ähmiýetini belledi.
Türkmen tarapy 2017-nji ýyldan bäri uniwersitetiň 11 talybynyň alyş-çalyş maksatnamalary boýunça Tokio daşary ýurt dilleri uniwersitetinde bilim alandygyny habar berdi.
Şeýle hem, duşuşykda 2016-njy ýyldan bäri Halkara ynsanperwer ylymlary we ösüş uniwersitetinde hereket edýän Global Ýapon ofisiniň alyp barýan işleri bellenilip geçildi.
Gepleşikleriň netijesi boýunça taraplar hyzmatdaşlygy mundan beýläk-de giňeltmäge we täze bilelikdäki taslamalary durmuşa geçirmäge gyzyklanma bildirýändiklerini tassyklady.
