Motiwasiýa beriji fitnes-kontente gysga wagtlyk seretmek hem adamyň özüni başgalar bilen deňeşdirmegini güýçlendirip, sagdyn däl berhiz endiklerine iterip biler. Şeýle netijäni «Health Communication» žurnalynda çap edilen barlagyň awtorlary öňe sürýär.
Barlagçylar 6000-den gowrak adamyň gatnaşmagynda geçirilen 26 sany eksperimental işiň maglumatlaryny seljerdi. Synaglara ABŞ-nyň, Awstraliýanyň, Kanadanyň, Irlandiýanyň, Italiýanyň, Beýik Britaniýanyň we Täze Zelandiýanyň ýaşaýjylary gatnaşdy. Gatnaşyjylaryň ortaça ýaşy 21,9 boldy.
Alymlar Instagram, Pinterest, TikTok we Tumblr platformalaryndaky kontentleri öwrendi. Gürrüň «fitspiration» (fitness we inspiration sözleriniň birikmesi) formatyndaky kontent barada barýar. Şeýle materiallar, adatça, sport tarapdan beden gurluşyny görkezýär hem-de tertip-düzgün, türgenleşik we iýmitleniş baradaky postlar bilen berilýär.
Seljerme şeýle materiallaryň «sustuňy basýan deňeşdirmeleri» güýçlendirýändigini görkezdi. Bu ýagdaýda adam ekrandaky adamlar bilen deňeşdireninde özüni o diýen özüne çekiji däl, üstünlik gazanmadyk ýa-da tutanýerli däl diýlip hasaplap başlaýar.
Barlagçylar şeýle kontentiň täsiriniň dürli jynsdaky we dürli beden agramynyň indeksi bolan adamlarda, takmynan, birmeňzeş ýüze çykýandygyny anyklady. Şol bir wagtyň özünde, ýaşyň ulalmagy bilen gatnaşyjylarda şeýle postlara seredenden soň sport bilen meşgullanmak islegi has ýygy-ýygydan döreýär eken.
Barlagyň awtorlary türgenleşiklere we berhizlere bolan höwesiň artmagynyň iýmitleniş tertibiniň bozulmagy we aşa çäklendirmeler ýaly töwekgelçiliklere getirip biljekdigini belledi.
