Horwatiýanyň Winkowsi şäherinde açyk bazaryň durkuny täzelemek işleri wagtynda arheologlar gadymy Sibalae şäherine degişli rim nekropolyny (gonamçylygyny) ýüze çykardy. Şol ýerde dolulygyna saklanyp galan we hiç hili talaňçylyga sezewar edilmedik kerpiçden gurlan gubur hem tapyldy.
Şäher häkimliginiň we Winkowsi muzeýiniň maglumatlaryna görä, gazuw-agtaryş işleriniň geçirilýän ýerinde eýýäm rim döwrüne degişli 44 sany gubur ýüze çykaryldy, olaryň 19-ysy öwrenildi. Tapyndylaryň agramly bölegi biziň eýýamymyzyň II–III asyrlaryna — Sibalae şäheriniň Rimiň Pannonniýa welaýatynyň möhüm merkezi bolan döwürlerine degişlidir.
Esasy tapyndy bolsa 40–45 ýaşlaryndaky bir erkegiň galyndylary bolan ýapyk kerpiç gubur boldy. Arheologlar skeletiň örän gowy saklanandygyny, munuň bolsa jaýlanan adamyň iýmitlenişinden başlap, hroniki kesellerine we fiziki agyrlyklaryna çenli hemmetaraplaýyn barlaglary geçirmäge mümkinçilik berýändigini habar belleýär.
«Winkowsiniň çäginde ýapyk, el degrilmedik guburlara örän seýrek duş gelýäris. Häzirki wagta çenli öwrenilen 200-den gowrak rim kerpiç guburlaryndan diňe ikisi talaňçylyga sezewar edilmedik ýagdaýda tapyldy» – diýip, şäher muzeýiniň direktory Hrwoýe Wuliç belledi.
Guburyň içinde merhumyň sag dabanynyň ýanyndan demir we sag egniniň ýanyndan kiçiräk bürünç bölekler tapyldy. Arheologlar bu tapyndynyň gymmatlygynyň, ilkinji nobatda, guburyň taryhy keşbiniň bozulman saklanyp galmagyndadygyny nygtaýar.
Taryhçylaryň bellemegine görä, häzirki Winkowsi şäheri gadymy rim obalarynyň üstünde ýerleşýär, şonuň üçin hem şäherdäki gurluşyk işleri, köplenç, täze arheologik tapyndylaryň ýüze çykmagyna sebäp bolýar.
