NASA-nyň radiolokasiýa ulgamynyň maglumatlaryna görä, Meksikanyň paýtagty Mehiko şäheri her aýda ortaça 1,5 santimetr ýere çökýär.
Şeýlelikde bir ýylyň dowamynda şäheriň ýer derejesiniň peselmegi 25 santimetre ýetýär. CNN telekanalynyň habar bermegine görä, bu ýagdaý onlarça ýyl bäri dowam edýär, soňky ýyllarda bolsa, ol has-da çaltlandy. Munuň esasy sebäbi hökmünde ýerasty suwlaryň çäksiz mukdarda sorulmagy we şäherleşme ýagdaýynyň (uly binalaryň) toýunly toprakda döredýän agramy görkezilýär.
Mehikonyň ýere çökýändigi ilkinji gezek 1920-nji ýyllarda anyklanylypdy. Şondan bäri şäheriň ýollaryna, jaýlaryna, demir ýollaryna we suw turbalaryna uly zeper ýetdi. Iň köp zyýan çeken desgalaryň arasynda Benitto Huares adyndaky halkara aeroporty we «Garaşsyzlyk perişdesi» ýadygärligi bar. Ýer derejesiniň üýtgemegi sebäpli, bu ýadygärligiň sütünine goşmaça 14 sany basgançak gurmaly boldy.
Şeýle meseleler dünýäniň beýleki iri şäherlerinde hem bar. Meselem, Tähranyň (Eýran) käbir etraplarynda ýer her ýyl 25–30 santimetr peselýän bolsa, Jakarta-da (Indoneziýa) takmynan 15 santimetr aşak çökýär. Indoneziýanyň häkimiýetleri bu mesele zerarly paýtagty täze guruljak şähere göçürmek kararyna-da geldiler.
