3–8-nji maý aralygynda Türkiýäniň Izmir şäherinde guralan «Turan» halkara kinofestiwalynda türkmen kinematografiýaçylary uly üstünlik gazandy. Bu barada THP habar berýär.
Egeý uniwersiteti tarapyndan Türkiýäniň Medeniýet we syýahatçylyk ministrliginiň goldamagynda geçirilen bu çäre türki halklaryň kino sungatyny dünýä tanatmakda we medeni gatnaşyklary berkitmekde möhüm ähmiýete eýe boldy.
Festiwalyň çäklerinde türkmen filmleriniň ýörite görkezilişi guralyp, onda ýurduň baý medeni mirasy we döwrebap kino sungaty beýan edildi. Türkmen režissýorlaryndan başga-da, Gazagystandan, Gyrgyzystandan, Özbegistandan, Azerbaýjandan we Türkiýeden kinematografiýaçylar öz işlerini hödürledi.
7-nji maýda geçirilen sylaglama dabarasynda türkmen wekilleri abraýly baýraklaryň üçüsine mynasyp görüldi. Režissýor Batyr Batyrowyň «Ýeňişli ädimler» filmi «Iň gowy doly metražly film» diýlip yglan edildi. Mekan Gurbanalyýew «Mähir terbiýesi» filmi üçin «Iň gowy gysga metražly film» baýragyny aldy. Röwşen Welmiýew bolsa «Meniň oýnum» atly multiplikasion filmi üçin eminleriň ýörite baýragyna mynasyp boldy.
Türkmen ussatlarynyň halkara derejesindäki bu ýeňişleri ýurduň kino sungatynyň ösmegine we dünýä kinematografiýasyndaky ornunyň berkemegine uly goşant goşýar.
