Sankt-Peterburgyň ITMO uniwersitetiniň binýadynda geçirilen Demirgazyk ýurtlaryň uniwersitetleriniň XII halkara matematika olimpiadasynda (NCUMC-2026) türkmen talyplary uly üstünlik gazandy. Bäsleşik Russiýadan, Awstriýadan, Özbegistandan, Beýik Britaniýadan, Germaniýadan we beýleki ýurtlardan jemi 500-den gowrak talybyň gatnaşmagynda geçirildi diýip, THP habar berýär.
Intellektual bäsleşikde Oguz han adyndaky Türkmenistanyň Inžener-tehnologiýalar uniwersitetiniň talyplary Gülöwser Gylyçmämmedowa kümüş we Döwletgeldi Şakirjanow bürünç medallary aldy. Şeýle hem Ýagşygeldi Kakaýew adyndaky Halkara nebit we gaz uniwersitetiniň talyplary Yslam Haýytmuhammedow bilen Halmyrat Myratgeldiýew kümüş medallara mynasyp boldy.
Mundan başga-da, Türkmen döwlet ykdysadyýet we dolandyryş institutynyň, Halkara ynsanperwer ylymlary we ösüş uniwersitetiniň, S.A. Nyýazow adyndaky Türkmen oba hojalyk uniwersitetiniň, Inžener-tehniki we ulag kommunikasiýalary institutynyň hem-de Türkmenistanyň Döwlet energetika institutynyň talyplary baýrakly orunlary eýelemegi başardy.
Ýaşlaryň bu intellektual bäsleşikde gazanan netijeleri ýurtda ýokary derejeli hünärmenleri taýýarlamaga we bilim ulgamyna innowasion usullary ornaşdyrmaga gönükdirilen döwlet syýasatynyň netijeliligini tassyklaýar.
