Hytaý kuwwaty 16 MWt bolan dünýäde iň uly ýüzýän ýel turbinasyny ulanylyşa girizdi. «Three Gorges Pilot» diýlip atlandyrylýan desga 2-nji maýda Guandun welaýatynyň Ýanszýan kenaryndan, takmynan, 70 kilometr uzaklykda gurnaldy. Taslama «China Three Gorges Corporation» kompaniýasy tarapyndan amala aşyrylýar.
Deňiz düýbüne berkidilýän adaty ýel generatorlaryndan tapawutlylykda, täze turbina ýarym çümýän ýüzýän platformanyň üstünde oturdyldy. Bu usul ýel energetikasyny deňziň çuň suwlarynda ulanmaga mümkinçilik berýär. Adatça, beýle ýerlerde ýel has güýçli we durnukly bolýar, stasionar sütünleri gurmak bolsa mümkin däl ýa-da örän kyn.
Turbinanyň periň ujuna çenli beýikligi 270 metrden geçýär, rotorynyň diametri bolsa, takmynan, 252 metre deň. Onuň aýlanýan meýdanynyň ululygy ýedi sany futbol meýdançasy bilen deňeşdirilip bilner. Uzynlygy 80,8 metr, ini 91 metr bolan platformanyň agramy, takmynan, 24 100 tonna bolup, ol poliefir süýümli tanaplar we labyr zynjyrlary bilen bilelikde dokuz sany ýörite labyr arkaly ýerinde saklanýar.
Inženerleriň aýtmagyna görä, bu taslamada Hytaýda ilkinji gezek birnäçe täze tehniki çözgütler ulanyldy: dinamiki monitoring ulgamy, işjeň ballast ulgamy, täze şwartowka ulgamy we 66 kWt-lyk kabeller.
Tieşan portunda dolulygyna gurnalandan soň, turbina Sýunszhou bogazy arkaly oturdylmaly ýerine tirkelip getirildi. Işe girizilenden soň, onuň ýylda, takmynan, 44,65 million kWt/sag elektrik energiýasyny öndürmegine garaşylýar. Bu mukdar 24 müň töweregi hojalygyň energiýa üpjünçiligi üçin ýeterlikdir.
