Amerikanyň Colossal Biosciences biotehnologiýa startapy ýok bolup giden gök antilopany «direltmekçi» bolýandygyny mälim etdi. CNN teleýaýlymynyň habar bermegine görä, bu taslama kompaniýanyň ýitirilen biologik görnüşleri «gaýtadan dikeltmekde» nobatdaky ädimi bolar.
Gök antilopalar häzirki Günorta Afrikanyň çäklerinde ýaşapdyr we takmynan, 1800-nji ýyldan bäri dolulygyna ýitip giden hasaplanýar. Bu haýwan öz adyny tüýüniň täsin gögümtil reňki sebäpli alypdyr. Häzirki wagtda dünýäde bu görnüşe degişli bary-ýogy dört sany gäp saklanyp galyp, olar Şwesiýanyň, Fransiýanyň, Awstriýanyň we Niderlandlaryň tebigy ylymlar muzeýlerinde ýerleşýär. Bu nusgalar alymlar üçin genetiki materialyň esasy çeşmesi bolar.
Görnüşi gaýtadan dikeltmek prosesi genomy redaktirlemek tehnologiýalaryny ulanmagy göz öňünde tutýar. Colossal Biosciences kompaniýasynyň hünärmenleri saklanyp galan galyndylardan DNK-ny almagy we antilopanyň häzirki wagtda ýaşaýan iň ýakyn kowumdaşlaryny surrogat göterijileri hökmünde ulanmagy meýilleşdirýär.
Kompaniýanyň wekilleri gök antilopanyň taryhy ýaşaýyş gurşawyna dolanmagynyň sebitiň ekoulgamyny dikeltmäge ýardam etjekdigini belleýär. Taslamanyň öňde goýan maksady örän uly bolsa-da, ol ylym äleminde etika we gaýtadan döredilen görnüşleriň häzirki zaman şertlerinde uzak wagtlap ýaşap bilmegi bilen baglylykda dürli çekişmeleri döredýär.
