Türkmenistanyň Halk Maslahatynyň Başlygy Arkadag şäherine saparynyň çäklerinde bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi.
Iş maslahatynyň dowamynda D.Orazow Türkmenistanyň Prezidentiniň we türkmen halkynyň Milli Lideriniň goldaw bermeginde Arkadag şäheriniň wekiliýetiniň Baku şäherinde Azerbaýjan Respublikasynyň Hökümeti tarapyndan Birleşen Milletler Guramasynyň Ilatly nokatlar boýunça Maksatnamasy (UN-Habitat) bilen bilelikde geçiriljek Şäherleriň Bütindünýä Forumynyň 13-nji mejlisine gatnaşmaga döredilen mümkinçilik üçin ýurt ýolbaşçylaryna hoşallyk bildirdi.
Maslahatyň barşynda bu halkara forumda Arkadag şäheriniň ýeten derejesiniň, «akylly» şäheriň mynasyp bolan halkara güwänamalarynyň ähmiýetiniň giňden beýan edilmelidigi bellenildi. Gurbanguly Berdimuhamedow täze şäheriň gurluşygynda ulanylan täzeçil tehnologiýalaryň we sanly ulgamyň halkara giňişliginde möhüm orna mynasyp boljakdygyna ünsi çekdi.
Şeýle hem maslahatda sanly ulgamyň mümkinçilikleriniň şäher ilatynyň we edara-kärhanalaryň elektrik toguny, tebigy gazy hem-de suw serişdelerini rejeli peýdalanmagynda aýratyn ähmiýetlidigi nygtaldy. Türkmenistanyň Halk Maslahatynyň Başlygy özara tejribe alyşmakda uly ähmiýeti bolan bu saparyň jemleri boýunça ýokary netijeleriň gazanyljakdygyna ynam bildirdi.
