Italiýanyň Günorta Tirol sebitindäki Briksen şäherinde täsin yşyk we suw festiwaly dowam edýär. Bu ýylky çäre dünýä parahatçylygyna bagyşlanyp, «Parahatçylygy göz öňüne getir» («Imagine Peace») diýlip atlandyryldy.
Festiwalda 13 ýurtdan gelen suratkeşleriň 24 sany özboluşly kompozisiýasy görkezilýär. 16-njy maýa çenli dowam etjek festiwala gatnaşýan taslamalar şäher meýdançalarynda, taryhy binalaryň diwarlarynda we iki sany dag derýasynyň kenarlarynda ýerleşdirildi.
Festiwalda biri-birinden gyzykly işler hödürlenilýar. Şolaryň birinde horwatiýaly suratkeş Marko Bolkowiç agaç söýeglerden gurnama döredip, onda dürli ýurtlaryň ýaşaýjylarynyň «Parahatçylyk näme?» diýen soraga beren jogaplaryny ýerleşdiripdir. Norwegiýada ýaşaýan iki sany ukrain suratkeşi bolsa, 980-nji ýylda gurlan taryhy buthananyň içinde şol wagtyň özünde çäge suratlaryny döredýärler. Olaryň eserlerinde gujagy çagaly eneleriň we esgerleriň öňünde duran çagajyklaryň ýatdagalyjy şekilleri nobatma-nobat geçip gidýär.
Dolomit Alplarynyň gözel görnüşi bilen utgaşan festiwalyň dabaraly ýapylyşy BMG-niň Halkara yşyk gününde bolar.
